Fins.az-ın media tərəfdaşlığı ilə Biznes Liderləri Zirvəsi uğurla başa çatıb
“Facemark” və “FutureBright” Şirkətlər Qrupunun birgə təşkilatçılığı ilə baş tutan zirvə liderlik, strateji inkişaf, innovasiya və dəyişən biznes mühitində uğurlu idarəetmə mövzularında müzakirələr üçün mühüm platforma rolunu oynayıb. “Qarada qırmızı” konsept mesajı ilə keçirilən tədbirdə 300-dən çox iştirakçı yer alıb.
Tədbirin media tərəfdaşı olan Fins.az zirvə çərçivəsində səsləndirilən fikirlərin, təqdim olunan yeniliklərin və biznes dünyasının gündəmində olan mövzuların geniş auditoriyaya çatdırılmasını təmin edib. İqtisadiyyat, maliyyə və biznes sahələrində ixtisaslaşan portal tədbirin informasiya dəstəyini həyata keçirərək onun daha geniş biznes ictimaiyyətinə tanıdılmasına töhfə verib.
Fins.az – biznes və iqtisadiyyatın etibarlı informasiya ünvanı
2013-cü il oktyabrın 18-də fəaliyyətə başlayan Fins.az bu gün Azərbaycanın aparıcı iqtisadi-media platformalarından biri hesab olunur. “Biznesin nəbzini tut!” devizi ilə fəaliyyət göstərən portal iqtisadiyyat, maliyyə, sənaye, kənd təsərrüfatı, turizm, avtomobil, əmlak, nəqliyyat və informasiya-kommunikasiya texnologiyaları sahələrində operativ xəbərlər, analitik yazılar, müsahibələr və bazar icmalları təqdim edir.
Portal dövlət qurumları, maliyyə institutları və biznes subyektləri ilə sıx əməkdaşlıq edərək ölkə iqtisadiyyatında baş verən proseslərin ictimaiyyətə çatdırılmasında mühüm rol oynayır. Obyektivlik, operativlik və peşəkar jurnalistika prinsiplərinə sadiq qalan Fins.az iqtisadi maarifləndirmənin təşviqi və sahibkarlıq mühitinin inkişafına dəstək göstərməyi əsas missiyalarından biri kimi müəyyənləşdirib.
VT Company şirkətinə məxsus olan portal şirkətin media, PR və kommunikasiya sahəsindəki peşəkar təcrübəsindən yararlanaraq fəaliyyətini uğurla davam etdirir.
Zirvədə qlobal liderlik və süni intellekt müzakirə olunub
Biznes Liderləri Zirvəsində yerli və beynəlxalq ekspertlər müasir liderlik modelləri, geosiyasi dəyişikliklərin biznesə təsiri, strateji idarəetmə və süni intellektin yaratdığı yeni imkanlar barədə çıxışlar ediblər.
Qlobal Siyasət Forumunun Akademik Koordinatoru və Özyeğin Universitetinin müəllimi Prof. Dr. Evren Balta geosiyasi dəyişikliklərin liderlik qərarlarına təsirindən danışıb. Harvard Business Review Türkiyənin baş redaktoru Serdar Turan strateji liderlik mövzusunda təqdimatla çıxış edib.
Universum Türkiyə Lideri Evrim Kuran yeni nəsil liderlik anlayışını şərh edib, süni intellekt və marketinq transformasiyası üzrə ekspert Yüce Zerey isə süni intellekt dövründə rəqabət üstünlüyünün əldə olunması yollarından bəhs edib. “FutureBright” Şirkətlər Qrupunun təsisçisi Akan Abdula texnologiya və innovasiyanın biznesə təsiri barədə fikirlərini bölüşüb.
Tədbirdə həmçinin Sabancı Universitetinin nümayəndəsi Dr. Emre Erol qlobal dəyişikliklərin təşkilatlara və liderlik yanaşmalarına təsiri ilə bağlı təqdimatla çıxış edib.
Biznes ictimaiyyəti üçün önəmli platforma
Zirvənin moderatoru, “FutureBright” Şirkətlər Qrupunun Azərbaycan üzrə ölkə direktoru Könül Əliyeva müzakirələrin interaktiv formatda keçirilməsini təmin edib. Sual-cavab sessiyaları iştirakçılara beynəlxalq ekspertlərlə birbaşa fikir mübadiləsi aparmaq imkanı yaradıb.
Biznes Liderləri Zirvəsi yeni biliklərin əldə olunması, beynəlxalq təcrübələrin paylaşılması, peşəkar əlaqələrin qurulması və gələcəyin biznes çağırışlarının müzakirəsi baxımından əhəmiyyətli platforma kimi yadda qalıb. Tədbirin media tərəfdaşı olan Fins.az isə bu mühüm biznes platformasının əsas mesajlarının geniş auditoriyaya çatdırılmasında mühüm rol oynayıb.
