Boru kəməri sənayesində vahid məlumat idarəetməsi həlledici rol oynayır - ROSEN Europe

Boru kəməri sənayesinin rəqəmsal transformasiyası məlumatların idarə edilməsi, idarəetmə sistemləri ilə inteqrasiya və vahid korporativ proseslərin inkişafı üzrə əlaqələndirilmiş yanaşma tələb edir.

Fins.az xəbər verir ki, bu barədə ROSEN Europe B.V.-nin Avropadakı Biznes Bölməsinin Dürüstlük İdarəetmə Sistemlərinin rəhbəri Qaurav Sinqh Bakıda keçirilən 31-ci Beynəlxalq Xəzər Neft və Qaz Sərgisində panel iclasında bildirib.

Onun sözlərinə görə, rəqəmsal həllərin effektiv tətbiqi yalnız texnologiyadan deyil, həm də şirkətlərin bu texnologiyaları qəbul etməyə təşkilati hazırlığından asılıdır.

Qaurav Sinqh qeyd edib ki, rəqəmsallaşdırma təşəbbüsləri üzrə idarəetmə dəstəyi vacibdir və bu proses ayrı-ayrı şöbələrlə məhdudlaşmadan bütün təşkilat səviyyəsində tətbiq olunmalıdır.

O vurğulayıb ki, şirkətlərdə məlumatların idarə edilməsinə vahid yanaşmanın formalaşdırılması aktivlərin və əməliyyat proseslərinin daha səmərəli idarə olunmasına şərait yaradır.

Sinqh bildirib ki, rəqəmsal texnologiyalar artıq geniş şəkildə mövcuddur, lakin onların real təsiri yalnız mövcud biznes proseslərinə inteqrasiya və effektiv məlumat mübadiləsi sistemlərinin qurulması ilə əldə olunur.

Onun sözlərinə görə, rəqəmsal təşəbbüslərin inkişafı üçün proseslərin əlaqələndirilməsi və təşkilat daxilində məlumatlarla işləmək üçün vahid standartların yaradılması mühüm əhəmiyyət daşıyır.

Qaurav Sinqh sonda qeyd edib ki, sənayenin gələcək inkişafı vahid əməliyyat modeli çərçivəsində məlumatların, proseslərin və rəqəmsal alətlərin daha geniş inteqrasiyası ilə bağlı olacaq.