Azərbaycanla Almaniya arasında ticarət əməliyyatlarının həcmi 1,4 milyard dollar olub

Finss.az - Ötən ilin yanvar-noyabr aylarında Azərbaycanla Almaniya arasında ticarət əməliyyatlarının həcmi 1,4 milyard ABŞ dolları təşkil edib.

Dövlət Gömrük Komitəsinin məlumatına görə, bu göstərici 2023-cü ilin eyni dövrü ilə müqayisədə 207,4 milyon ABŞ dolları və ya 12,7% azdır.

Hesabat dövründə Almaniya ilə ticarət dövriyyəsi Azərbaycanın ümumi ticarət dövriyyəsinin 3,31%-ni təşkil edib.

Ötən ilin 11 ayında Azərbaycan Almaniyaya 682,2 milyon ABŞ dolları dəyərində məhsul ixrac edib. Bu rəqəm 2023-cü ilin eyni dövrü ilə müqayisədə 108,8 milyon ABŞ dolları və ya 13,7% azdır. Dövr ərzində Almaniya ilə ixrac əməliyyatları ölkənin ümumi ixracının 2,80%-ni təşkil edib.

2024-cü ilin yanvar-noyabr aylarında Azərbaycan Almaniyadan məhsul idxalını illik müqayisədə 98,5 min ABŞ dolları və ya 11,7% azaldaraq, 744,2 milyon ABŞ dollarına çatdırıb. Almaniya ilə idxal əməliyyatları ölkənin ümumi idxalının 3,96%-ni təşkil edib.

Qeyd edək ki, ötən ilin yanvar-noyabr aylarında Azərbaycan xarici ölkələrlə 43,1 milyard ABŞ dolları dəyərində ticarət əməliyyatı aparıb. Bu rəqəm 2023-cü ilin eyni dövrünə nisbətən 4,2 milyard ABŞ dolları və ya 8,9% azdır.

Xarici ticarət dövriyyəsinin 24,3 milyard ABŞ dolları ixracın, 18,7 milyard ABŞ dolları isə idxalın payına düşüb. 2023-cü ilin ilk 11 ayı ilə müqayisədə ixrac 7,1 milyard ABŞ dolları və ya 22,8% azalıb, idxal isə 2,9 milyard ABŞ dolları və ya 18,7% artıb.

Nəticədə, xarici ticarətdə 5,5 milyard dollarlıq müsbət saldo yaranıb. Bu isə illik müqayisədə 10,1 milyard ABŞ dolları və ya 2,8 dəfə azdır.