Azərbaycanın Rusiya ilə ticarət dövriyyəsi artıb

2025-ci ildə Azərbaycan ilə Rusiya arasında ticarət əməliyyatlarının həcmi 4,920 milyard ABŞ dolları təşkil edib.

Finss.az Dövlət Gömrük Komitəsinin məlumatına əsasən xəbər verir ki, bu göstərici 2024-cü illə müqayisədə 120,4 milyon ABŞ dolları və ya 2,5% çoxdur.

Hesabat dövründə Rusiya ilə ticarət dövriyyəsi Azərbaycanın ümumi ticarət dövriyyəsinin 10,08%-ni təşkil edib və Rusiya Azərbaycanın ən çox ticarət əməliyyatları apardığı ölkələr sırasında 3-cü yerə yüksəlib.

2025-ci ildə Azərbaycandan Rusiyaya ixrac 1,184 milyard ABŞ dolları olub. Bu, 2024-cü illə müqayisədə 5,4 milyon ABŞ dolları və ya 0,5% çoxdur. İxracın 1,174 milyard ABŞ dolları qeyri-neft məhsullarının payına düşüb ki, bu da illik müqayisədə 12,4 milyon ABŞ dolları və ya 1,1% artım deməkdir. Nəticədə, Rusiya Azərbaycanın ən çox qeyri-neft məhsulları alıcısı olub.

Hesabat dövründə Rusiyadan Azərbaycana 3,736 milyard ABŞ dolları dəyərində məhsul idxal olunub. Bu, 2024-cü illə müqayisədə 115 milyon ABŞ dolları və ya 3,2% artım deməkdir. Beləliklə, Rusiya Azərbaycanın ən çox məhsul idxal etdiyi ölkələr sırasında Çindən sonra ikinci yerdə qərarlaşıb.

Qeyd edək ki, 2025-ci ildə Azərbaycan xarici ölkələrlə ümumilikdə 49,423 milyard ABŞ dolları dəyərində ticarət əməliyyatı aparıb. Bu göstərici əvvəlki ilə nisbətən 1,810 milyard dollar və ya 3,8% artım deməkdir.

Xarici ticarət dövriyyəsinin 25,043 milyard ABŞ dolları ixracın, 24,380 milyard ABŞ dolları isə idxalın payına düşüb. Son bir ildə ixrac 1,5 milyard dollar və ya 5,7% azalarkən, idxal 3,322 milyard dollar və ya 15,8% artıb.

Nəticədə, xarici ticarətdə 663 milyon dollarlıq müsbət saldo yaranıb. Bu, illik müqayisədə 4,833 milyard dollar və ya 8,3 dəfə azalma deməkdir.

Fuad Mədətov
Finss.az