Azərbaycanda kənd təsərrüfatı istehsalı artıb

2026-cı ilin yanvar-mart aylarında Azərbaycanda 1 milyard 717,6 milyon manat dəyərində kənd təsərrüfatı məhsulu istehsal edilib.

Fins.az Dövlət Statistika Komitəsinin məlumatına əsasən xəbər verir ki, bu göstərici ötən ilin eyni dövrü ilə müqayisədə real ifadədə 1,1% artım deməkdir. Bu, kənd təsərrüfatı sektorunda müsbət dinamikanın davam etdiyini göstərir.

Eyni zamanda qeyd olunub ki, hesabat dövründə Azərbaycanda ümumi daxili məhsul (ÜDM) 29 milyard 703,2 milyon manat təşkil edib. Bu isə 2025-ci ilin eyni dövrü ilə müqayisədə real ifadədə 0,3% azalma deməkdir.

ÜDM-in strukturuna əsasən, neft-qaz sektorunun dəyəri 8 milyard 531,6 milyon manat, qeyri-neft-qaz sektorunun dəyəri isə 21 milyard 171,6 milyon manat olub.

Müqayisəli göstəricilər göstərir ki, neft-qaz sektorunda ÜDM 1,2% azalıb, qeyri-neft-qaz sektorunda isə 0,2% artım qeydə alınıb.