Qızıl ucuzlaşdı, dollar gücləndi – bazarlarda qarışıq dinamika

Fins.az - Qlobal əmtəə bazarlarında cümə günü qarışıq tendensiya müşahidə olunub.

Asiya sessiyasında qızıl qiymətləri azalsa da, digər metallarda artım qeydə alınıb.

COMEX birjasında iyun ayı üzrə qızıl fyuçersləri 0,68% geriləyərək bir troya unsiyası üçün 4.785,32 ABŞ dollarına düşüb. Analitiklər bu enişi əsasən ABŞ dollarının möhkəmlənməsi ilə əlaqələndirirlər.

Texniki göstəricilərə əsasən, qızıl üçün əsas dəstək səviyyəsi 4.626,20 dollar, müqavimət səviyyəsi isə 4.888,00 dollar kimi qiymətləndirilir. Bu səviyyələr yaxın müddətdə qiymətlərin istiqaməti baxımından həlledici rol oynaya bilər.

Eyni zamanda, ABŞ dollarının əsas valyutalara qarşı mövqeyini ölçən indeks 0,12% artaraq 98,71 səviyyəsinə yüksəlib. Dolların bahalaşması adətən qızıl kimi alternativ aktivlərə təzyiq göstərir.

Digər qiymətli metallara gəldikdə isə, COMEX-də gümüş və mis qiymətlərində artım qeydə alınıb. May ayı üzrə gümüş fyuçersləri 0,47% artaraq 76,08 dollar, mis fyuçersləri isə eyni faizlə yüksələrək 5,78 dollar səviyyəsinə çatıb.

Ekspertlər bildirirlər ki, yaxın dövrdə qızıl qiymətlərinin dinamikası əsasən ABŞ pul-kredit siyasəti, dolların hərəkəti və qlobal iqtisadi qeyri-müəyyənliklərdən asılı olacaq.