Neft bahalaşdı, bazarlar sarsıldı: ABŞ fond indeksləri kəskin düşdü

Fins.az - ABŞ və İsrail ilə İran arasında qarşılıqlı zərbələr nəticəsində Hörmüz boğazında gəmilərin hərəkətinin demək olar ki, dayanması neft qiymətlərinin sürətlə artmasına səbəb olub.

Dünya üzrə neft tədarükünün təxminən beşdə biri bu marşrutdan keçdiyi üçün bazarlar bu vəziyyətə həssas reaksiya verib.

Analitiklər qeyd edir ki, artan enerji qiymətləri ABŞ iqtisadiyyatının gələcək inkişaf perspektivlərini daha qeyri-müəyyən edir.

ABŞ Əmək Nazirliyinin məlumatına görə, fevral ayında kənd təsərrüfatı sektoru istisna olmaqla ölkədə iş yerlərinin sayı 92 min azalıb. Bu göstərici analitiklərin gözləntilərindən xeyli zəif olub.

Eyni zamanda işsizlik səviyyəsi 4,3%-dən 4,4%-ə yüksəlib. Pərakəndə satışlar da zəifləyərək yanvar ayında aylıq müqayisədə 0,2% azalıb.

Federal Ehtiyat Sisteminin nümayəndəsi Kristofer Uoller bildirib ki, İranla mümkün müharibə ABŞ-da inflyasiyaya uzunmüddətli təsir göstərməyə bilər. Onun sözlərinə görə, ABŞ Mərkəzi Bankı enerji və ərzaq kimi dəyişkən qiymətləri nəzərə almayan əsas inflyasiya göstəricisinə daha çox diqqət yetirir.

Fond bazarında neft və müdafiə sənayesi şirkətlərinin səhmləri əsasən artım göstərsə də, bank və texnologiya sektorunda geriləmə müşahidə olunub.

Ticarətin yekununda Dow Jones indeksi 0,95%, S&P 500 indeksi 1,33%, Nasdaq Composite indeksi isə 1,59% azalıb.