Neft 80 dolları keçdi

Fins.az - Yaxın Şərqdə hərbi əməliyyatların genişlənməsi qlobal enerji bazarlarında qiymət artımını sürətləndirib.

Brent markalı neft 82 dolları ötərək son aylərin maksimumuna yüksəlib.

ABŞ Prezidenti Donald Trampın enerji tədarükünün fasiləsiz təmin ediləcəyinə dair açıqlaması artım tempini bir qədər zəiflədib. Buna baxmayaraq, bazar iştirakçıları Hörmüz boğazı ətrafında yaranmış riskləri ciddi qiymətləndirirlər. Qlobal neft axınının təxminən beşdə biri məhz bu strateji keçiddən həyata keçirilir.

Hörmüz boğazı əsas risk faktoru kimi

İranın tankerlərin hərəkətini dayandırmaqla bağlı bəyanatları və ABŞ Hərbi Dəniz Qüvvələrinin mümkün müşayiət planları bazarda volatilliyi artırır. Analitiklər hesab edir ki, hazırda bazar üçün əsas siqnallar real ixrac həcmləri və regiondakı hərbi dinamika olacaq.

Ehtiyatlar artdı, amma bazar buna reaksiya vermədi

ABŞ-da neft ehtiyatlarının 5,6 milyon barel artmasına baxmayaraq, geosiyasi risklər bazar dinamikasını müəyyən edən əsas faktor olaraq qalır.

Ekspertlər bildirirlər ki, münaqişənin genişlənməsi davam edərsə, neftin qiyməti qısa müddətdə daha da yüksələ bilər və bu, qlobal inflyasiya təzyiqlərini artıracaq.