Avropada qaz bahalaşıb

Avropa qaz bazarında qiymətlərdə artım qeydə alınıb.

Finss.az xəbər verir ki, ötən gün hərracların bağlanışında Avropada 1000 kubmetr təbii qazın qiyməti 412 ABŞ dollarını ötüb. 5 fevral tarixində Niderlandın TTF (Title Transfer Facility) indeksində mart ayı üzrə fyuçerslərin qiyməti 412,5 ABŞ dolları səviyyəsində formalaşıb.

Bu göstərici əvvəlki hesablama qiyməti olan 409,4 ABŞ dolları ilə müqayisədə 0,7% artım deməkdir. TTF indeksi Avropanın ən likvid virtual qaz ticarət mərkəzi hesab olunur və region üzrə qiymət formalaşmasında əsas göstəricilərdən biridir.

Qeyd edək ki, 2020-ci il dekabrın 31-dən etibarən Trans-Adriatik boru kəməri (TAP) vasitəsilə Azərbaycan qazının Avropaya nəqli həyata keçirilir. TAP layihəsi Avropanın enerji təhlükəsizliyinin gücləndirilməsində mühüm rol oynayır.