Təmassız ödənişlər üç dəfə artacaq

İngiltərə mərkəzli araşdırma şirkəti “Juniper Research” təmassız ödənişlərin cari vəziyyəti və gələcək proyeksiyaları ilə bağlı hesabat paylaşıb. “Contactless Payments: Market Status, Vendor Analysis & Market Forecasts 2020-2024” adlı hesabata əsasən, hal-hazırda 2 trilyon dollar həcmində olan təmassız ödəniş tranzaksiyaları 2024-cü ilədək 300%-ə dək artaraq 6 trilyona dollara çatacaq.

Bu böyüməyə təsir göstərəcək əsas amillər kimi ağıllı telefonlarda OEM Pay vasitəsilə təmassız ödənişlərin sürətlə yayılması, ABŞ-da hər il daha çox təmassız kartların istifadəyə verilməsi və Çinin təmassız POS terminal infrastrukturunu genişləndirməsi göstərilib.

Xüsusi ilə ABŞ-ın təmassız ödənişlər bazarında 8 dəfədən artıq böyümə proqnozlaşdırılır. Belə ki, hal-hazırda 178 milyard dollarlıq təmassız ödəniş tranzaksiyasına həcminə malik olan ABŞ-da 2024-cü ildə bu göstəricinin 1.5 trilyonu ötməsi gözlənilir.