Yeni BMW iX xDrive60: 701 km yürüş ehtiyatı və 544 at gücü
Fins.az – BMW yeni iX xDrive60 elektrik krossoverini müasir dizaynı, yüksək performansı və qabaqcıl rəqəmsal texnologiyaları ilə təqdim edib.
Şirkətin məlumatına görə, modelin WLTP standartına əsasən qarışıq dövrədə elektrik enerjisi sərfiyyatı 100 kilometrə 21,9–17,9 kVt/saat təşkil edir. Avtomobilin maksimal yürüş ehtiyatı isə 563–701 km arasında dəyişir. Bildirilib ki, faktiki yürüş məsafəsi sürücülük tərzi, yol şəraiti, hava temperaturu, isitmə və ya kondisioner sistemindən istifadə, eləcə də əvvəlcədən kondisionerləşdirmə kimi amillərdən asılı olaraq dəyişə bilər.
Məlumata əsasən, BMW iX xDrive60 400 kVt (544 at gücü) güc hasil edir, 0-dan 100 km/s sürətə 4,6 saniyəyə çatır və maksimal 200 km/s sürət yığır. Modelin maksimal baqaj həcmi 1 750 litrdir.
Şirkət bildirib ki, yeni BMW iX uzun məsafəli səfərlər üçün nəzərdə tutulub. Avtomobilin batareyası 195 kVt gücündə sürətli enerji doldurma məntəqəsində 10%-dən 80%-ə qədər təxminən 35 dəqiqəyə enerji ilə doldurulur. Model növbəti enerji doldurma məntəqəsinə yaxınlaşarkən batareyanın temperaturunu avtomatik optimal səviyyəyə çatdıraraq doldurma prosesini sürətləndirir. Bu funksiyanın mobil tətbiq vasitəsilə də idarə olunması mümkündür.
Eksteryerdə işıqlandırılan BMW Iconic Glow radiator barmaqlığı, şaquli gündüz hərəkət işıqları, yeni formalı ön faralar və kvadrat təkər tağları avtomobilin əsas dizayn elementləri kimi təqdim edilir. Model, həmçinin 23 düymlük BMW Individual 1028 I Multicolour aerodinamik yüngül lehimli disklərlə təchiz oluna bilir və 2,5 tona qədər qoşqu çəkmək imkanına malikdir.
Salon minimalistik dizayn konsepsiyası əsasında hazırlanıb. Avtomobildə idman tipli M çoxfunksiyalı oturacaqlar, uzunluğu 2 metrdən çox olan Sky Lounge panoramik şüşə dam, M dizayn elementləri və sürücüyə istiqamətləndirilmiş əyri BMW displeyi yer alır.
Şirkətin məlumatına görə, model adaptiv ön və arxa pnevmatik asqı sistemi, inteqral aktiv sükan idarəetməsi, aşağı ağırlıq mərkəzi və iki elektrik mühərriki sayəsində yüksək idarəetmə və dinamik sürüş xüsusiyyətləri təqdim edir. Avtomobilin maksimal fırlanma anı 765 Nm təşkil edir.
BMW iX xDrive60 müxtəlif rəqəmsal texnologiyalarla da təchiz edilib. Shy Tech konsepsiyası çərçivəsində radiator barmaqlığında dairəvi görüntü kameraları və radar sensorları inteqrasiya olunub. BMW Maps marşrut planlaşdırarkən enerji doldurma dayanacaqlarını avtomatik müəyyən edir və batareyanı əvvəlcədən optimal temperatura çatdırır. Bundan əlavə, avtomobildə yüksək keyfiyyətli videostriminq xidmətləri və AirConsole platforması vasitəsilə smartfondan idarə olunan video oyun funksiyası da təqdim olunur.
