BMqT-nin və Koreya Beynəlxalq Əməkdaşlıq Agentliyinin (KOICA) Azərbaycandakı nümayəndəlikləri Ağdam, Şəmkir və Cəbrayıl rayonlarına monitorinq səfəri həyata keçirib.

Fins.az xəbər verir ki, səfərin məqsədi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsinin icrasını qiymətləndirmək olub. Layihə sahələrinə baş çəkməzdən əvvəl Mingəçevirdə tamamlanmış və planlaşdırılan bərpa işlərinin icmalı ilə bağlı görüş keçirilmişdir. İştirakçılar gələcək planları və bərpa olunan kəhrizlərin təhvil verilmə tarixlərini müzakirə ediblər.

Layihə sahələrinə səfər zamanı BMqT-nin Azərbaycan nümayəndəliyinin rəhbəri vəzifəsini müvəqqəti icra edən Amr Taha kəhrizlərin bərpasının fərdi ev təsərrüfatları səviyyəsində su və gigiyena imkanlarının yaxşılaşdırılmasına, icma səviyyəsində iqtisadi inkişafa töhfə verdiyini və daha geniş miqyasda Azərbaycanın yaşıl və ağıllı yaşayış məntəqələrinin yaradılması konsepsiyasına dəstək olduğunu qeyd etdi. “Bütün bunlar Azərbaycanın hüdudlarından kənarda da təkrarlanması lazım olan bir layihə üçün heç də kiçik töhfələr deyil”, - deyə Amr Taha vurğuladı.

Monitorinq qrupu Ağdam və Şəmkir rayonlarında yerli icmalara təhvil verilmiş kəhrizlərə onların hazırkı vəziyyətlərini qiymətləndirmək üçün baxış keçirib, Cəbrayıl rayonunda yerləşən “Əsgər”, “Orta”, “Xəlifə dərəsi”, “Gül Qasım”, “Sığı” kimi kəhrizlərdə aparılan və planlaşdırılan bərpa işləri ilə tanış olublar. Qrup üzvləri, həmçinin layihənin icrasında iştirak edən kankanlar, mühəndislər və yerli sakinlərlə də görüşüb.

Şəmkir rayonunun İrmaşlı kənd bələdiyyəsinin sədri Qalib Atakişiyev təşkilatın Qaraoğlanlı kəhrizlərinin bərpası istiqamətində gördüyü işləri yüksək qiymətləndirib. O, vurğuladı ki, bərpa edilərək təhvil verilən kəhrizlər iqlim dəyişikliyinin mənfi təsiri olan su qıtlığı ilə üzləşən kənd sakinlərinin içməli su ilə təminatında mühüm əhəmiyyət kəsb edir.

Layihə çərçivəsində indiyədək BMqT-nin Azərbaycan nümayəndəliyi tərəfindən Ağdam, Goranboy, Füzuli, Göygöl, Qazax, Şəmkir və Cəbrayıl rayonlarında yerləşən ümumilikdə 28 kəhrizin bərpası uğurla həyata keçirilib.

Layihənin ümumi məqsədi Azərbaycanda kənd təsərrüfatı icmalarının enerjisiz su təchizatını təmin etməklə kənd təsərrüfatı məhsuldarlığını və yaşayış imkanlarını artırmaqla məcburi iqtisadi miqrasiyanın qarşısının alınmasına töhfə verməkdir. Kəhrizlərin bərpası ilə yanaşı, layihə gender, idarəetmə və ətraf mühitin davamlılığı kimi məsələlərə xüsusi diqqət yetirərək icma tərəfindən idarə olunan bir yanaşmanı tətbiq etməyə davam edir.

Ümumilikdə, layihə Azərbaycanın BMT-nin Dayanıqlı İnkişaf Məqsədlərinin (DİM) həyata keçirilməsi səylərinə bir sıra istiqamətlərdə töhfə verir. Bu istiqamətlərə yoxsulluğa son qoyulması və qida təhlükəsizliyinin təmin edilməsinə (DİM 1) birbaşa təsiri olan ev təsərrüfatlarının daxili ehtiyacı və suvarma suyu ilə təmin edilməsi, qadınların imkanlarının artırılması və qərar vermə proseslərində iştirakının təmin olunması, aid olduqları icmalarda liderlik rollarının artırılması (DİM 5), ekoloji cəhətdən təmiz və dayanıqlı su təchizatı sistemlərinin bərpası, kəhrizlər və təhlükəsiz içməli suya əlçatanlığın gücləndirilməsi daxildir (DİM 6). Layihə, həmçinin təhlükəsiz və qanuni miqrasiya və mobilliyin asanlaşdırılmasına yönəlmiş 10.7 saylı hədəfə də dəstək verir. 

Məhəbbət Məmmədov
Fins.az