Aritmiyanın müalicəsində yeni mərhələ – Vyana alimlərinin kəşfi

Fins.az - Vyana alimləri ürək ritm pozğunluğu olan aritmiyanın müalicəsində yeni mərhələnin əsasını qoyan innovativ üsul təqdim ediblər.

Vyana Universitetinin xəstəxanası və “Vienna MedUni” klinikasının kardioloqları Avstriyada ilk dəfə olaraq hibrid proseduru tətbiq ediblər. Bu üsul minimal invaziv cərrahiyyə ilə qabaqcıl kateter ablasiyasını birləşdirir.

Yeni yanaşma xüsusilə mədəcik taxikardiyasının müalicəsinə yönəlib. Bu xəstəlik zamanı ürəyin aşağı kameraları təhlükəli dərəcədə sürətlə döyünür və vaxtında müalicə olunmadıqda qəfil ürək ölümünə səbəb ola bilər.

Prosedur iki əsas texnologiyanın inteqrasiyasına əsaslanır: torakoskopiya və kateter əsaslı elektrofizioloji ablasiyası. Əməliyyat zamanı cərrahlar qabırğalar arasındakı kiçik kəsiklər vasitəsilə kameranın köməyi ilə ürəyin xarici səthinə daxil olur, eyni zamanda kardioloqlar ürəyin daxilində aritmiyaya səbəb olan zədələnmiş toxumanı dəqiq şəkildə aradan qaldırırlar.

Mütəxəssislər bu üsulun ağır aritmiya hallarında daha effektiv və təhlükəsiz müalicə imkanları yaradacağını bildirirlər.