Azərbaycanda orta aylıq əməkhaqqı artıb

2026-cı ilin yanvar-fevral aylarında Azərbaycanda muzdla çalışan işçilərin orta aylıq nominal əməkhaqqı 5,3 faiz artaraq 1099,1 manat təşkil edib.

Fins.az-ın Dövlət Statistika Komitəsinə istinadən verdiyi məlumata görə, artım ötən ilin eyni dövrü ilə müqayisədə qeydə alınıb.

Məlumata əsasən, cari ilin martın 1-i vəziyyətinə ölkədə muzdla çalışan işçilərin ümumi sayı 1 milyon 784 min nəfər olub. Onların 870,6 min nəfəri dövlət sektorunda, 913,4 min nəfəri isə qeyri-dövlət sektorunda fəaliyyət göstərib.

Sahələr üzrə bölgüyə baxıldıqda, muzdla çalışan işçilərin 18,5 faizi ticarət və nəqliyyat vasitələrinin təmiri sahəsində, 18,3 faizi təhsil sektorunda, 13,8 faizi sənayedə, 8,6 faizi səhiyyə və sosial xidmətlərdə, 6,5 faizi tikintidə, 6,1 faizi dövlət idarəetməsi və müdafiə, 4,4 faizi nəqliyyat və anbar təsərrüfatında, 4,0 faizi peşə, elmi və texniki fəaliyyət sahəsində, 2,4 faizi maliyyə və sığorta sektorunda, 2,3 faizi kənd təsərrüfatı, meşə təsərrüfatı və balıqçılıqda, 15,1 faizi isə iqtisadiyyatın digər sahələrində məşğul olub.

Ümumilikdə, 2026-cı ilin yanvar-fevral aylarında əmək bazarında müşahidə olunan dinamika orta aylıq nominal əməkhaqqının 1099,1 manat səviyyəsinə yüksəlməsi ilə nəticələnib.