Neft-qaz sektorunda texnologiyaların tətbiqi ixtira qədər çətin mərhələdir - SOCAR

Fins.az - “SOCAR Upstream Management International LLC”nin baş direktorunun müşaviri Ayaz Əmirov Bakıda keçirilən 31-ci Beynəlxalq Xəzər Neft və Qaz Sərgisi çərçivəsində təşkil olunan panel sessiyada neft-qaz sektorunda texnoloji innovasiyaların tətbiqi ilə bağlı fikirlərini bölüşüb.

O bildirib ki, sənayedə yeni texnologiyaların yaradılması qədər onların praktik tətbiqi də ciddi çətinliklər yaradır. Əmirovun sözlərinə görə, innovasiyanın uğuru yalnız ideya və ya ixtira mərhələsində deyil, onun real əməliyyat mühitinə inteqrasiyasında müəyyən olunur.

“Yeni texnologiyanın tətbiqinin mürəkkəbliyi onun ixtirasının mürəkkəbliyi ilə müqayisə oluna bilər. Təklif edilən həllin həqiqətən işləyəcəyinə və nəticə verəcəyinə insanları inandırmaq lazımdır”, – deyə o qeyd edib.

SOCAR rəsmisi vurğulayıb ki, əsas istiqamətlərdən biri bu texnologiyaları istifadə edən operatorlar və mütəxəssislər arasında etimad mühitinin formalaşdırılmasıdır. Onun sözlərinə görə, yalnız texnologiya deyil, insan amili də bu prosesdə həlledici rol oynayır.

Əmirov əlavə edib ki, SOCAR beynəlxalq təcrübəni yaxından izləyir, texnoloji həllər üzrə qlobal təchizatçılarla əməkdaşlıq edir və bu innovasiyaların regiondakı əməliyyat şirkətlərində tətbiqinə dəstək verir.

Onun sözlərinə görə, məqsəd ən perspektivli texnologiyaların seçilməsi və onların operatorların gündəlik fəaliyyətinə inteqrasiyasının sürətləndirilməsidir. Bu isə nəticə etibarilə həm şirkətlərin səmərəliliyinə, həm də ölkənin enerji sektorunun inkişafına töhfə verir.

SOCAR nümayəndəsi həmçinin sektor iştirakçıları arasında əməkdaşlığın genişləndirilməsinin və təcrübə mübadiləsi üçün platformaların yaradılmasının vacibliyini vurğulayıb.