Ukrayna və Aİ enerji bazarlarının inteqrasiyasına dair qanun qəbul edilib

Fins.az - Ukraynada Avropa İttifaqı ilə enerji bazarlarının inteqrasiyasını nəzərdə tutan yeni qanun qüvvəyə minib. Prezident Volodimir Zelenski tərəfindən imzalanan sənəd ölkənin elektrik enerjisi sektorunun Aİ standartlarına uyğunlaşdırılmasını hədəfləyir.

Qanun Ukrayna enerji bazarında Avropa İttifaqı və Enerji Birliyinin qaydalarının tətbiqini genişləndirir. Bu addım ölkənin Assosiasiya Sazişi çərçivəsində üzərinə götürdüyü öhdəliklərin yerinə yetirilməsinə xidmət edir.

Yeni tənzimləmələr elektrik enerjisi bazarında şəffaflığın artırılması, rəqabətin gücləndirilməsi və təchizatın etibarlılığının yüksəldilməsini nəzərdə tutur.

Mütəxəssislərin fikrincə, bu inteqrasiya Ukraynanın Avropa enerji sisteminə daha dərin inteqrasiyasına və bazarın modernləşdirilməsinə imkan verəcək.