Serbiya neft və yanacaq ixracını dayandırdı – bazar üçün yeni risklər

Fins.az - Serbiya hökuməti daxili bazarda mümkün yanacaq çatışmazlığının və qiymət artımının qarşısını almaq üçün neft və motor yanacağı kimi istifadə olunan bütün neft məhsullarının ixracını müvəqqəti qadağan edib.

Bu qərar hökumətin növbədənkənar iclasında qəbul olunub. Qadağa dizel yanacağı, benzin və xam neftə şamil olunur.

Ölkənin mədən sənayesi və energetika naziri Dubravka Dedoviç Handanoviç bildirib ki, məhdudiyyət bütün nəqliyyat vasitələri ilə həyata keçirilən ixraca tətbiq ediləcək və 19 mart tarixinədək qüvvədə olacaq.

Nazirin sözlərinə görə, qərarın əsas məqsədi qlobal enerji bazarında baş verən sarsıntılar fonunda daxili bazarın qorunması və qiymətlərin sabit saxlanılmasıdır.

O qeyd edib ki, Serbiyada vətəndaşlar yanacaq məhsullarını çox vaxt birja qiymətlərindən daha aşağı qiymətə əldə edirlər və dövlət həm əhalini, həm də iqtisadiyyatı qorumaq üçün müxtəlif tədbirlər həyata keçirir.

Ekspertlərin fikrincə, enerji bazarlarında artan geosiyasi gərginlik fonunda bir sıra ölkələr daxili enerji təhlükəsizliyini təmin etmək üçün oxşar addımlar ata bilər. Bu isə regionda yanacaq ticarətinə və qiymətlərə müəyyən təsir göstərə bilər.