İqlim böhranının əsas yükü ultra-varlıların üzərinə düşür

Yeni araşdırmalar dünyanın ən varlı 1 faizinin sahib olduqları şirkətlər, investisiyalar və digər aktivlər vasitəsilə qlobal emissiyaların əhəmiyyətli hissəsinə nəzarət etdiyini və iqlimə hər il təxminən 1 trilyon dollar həcmində ziyan vurduğunu ortaya qoyub.

Fins.az xarici mediaya istinadən xəbər verir ki, hesabata görə, sərvət baxımından ən yüksək 1 faiz qlobal “mülkiyyət əsaslı” emissiyaların təxminən 40 faizinə cavabdehdir. Bu göstəriciyə müəssisələrin fəaliyyəti, maliyyə yatırımları və müxtəlif aktivlərlə əlaqədar yaranan karbon tullantıları daxildir.

Araşdırmaya görə, dünya əhalisinin ən yoxsul yarısının payına isə cəmi 3 faiz emissiya düşür.

Müəlliflər bildiriblər ki, iqlim böhranına təsir yalnız şəxsi təyyarələrdən istifadə və ya dəbdəbəli həyat tərzi ilə məhdudlaşmır. Əsas səbəblərdən biri ultra-varlı şəxslərin yüksək karbon tutumlu şirkətlərə və layihələrə sahib olması, eləcə də bu istiqamətdə investisiyalar yatırmasıdır.

Hesabatda vurğulanıb ki, mövcud balanssızlığın aradan qaldırılması üçün sərvət vergilərinin tətbiqi və iqlim böhranına daha çox təsir göstərən şəxslərin həll yollarının maliyyələşdirilməsində daha böyük payla iştirak etməsi vacibdir.

Araşdırma həmçinin göstərib ki, banklar və iri maliyyə investorları ötən il qazıntı yanacağı layihələrinə 900 milyard dollar investisiya yatırıb.

Mütəxəssislərin fikrincə, sərvət bərabərsizliyinin artdığı bir dövrdə varlılarla adi vətəndaşların ətraf mühitə təsiri arasındakı fərq daha da qabarıq şəkildə hiss olunur.

Qeyd olunub ki, bu məsələ noyabr ayında keçiriləcək COP31 BMT İqlim Sammiti öncəsi beynəlxalq müzakirələrin əsas mövzularından biri hesab edilir.