Çin Tayvanla münasibətlərin yaxşılaşdırılması üçün 10 maddəlik paket açıqlayıb
Fins.az - Çin hökuməti Tayvanla münasibətlərin yaxşılaşdırılması məqsədilə 10 maddədən ibarət yeni siyasət paketi elan edib.
Çin Kommunist Partiyasının Tayvan Araşdırmaları Ofisinin açıqlamasına görə, təşəbbüs materik Çin ilə ada arasında əlaqələrin genişləndirilməsi və möhkəmləndirilməsinə yönəlib.
Siyasət paketi müxtəlif sahələri əhatə edir. Buraya siyasi partiyalar arasında ünsiyyət mexanizminin yaradılması, səyahət məhdudiyyətlərinin aradan qaldırılması və iqtisadi-humanitar əlaqələrin genişləndirilməsi daxildir.
Həmçinin sənəddə Çin Kommunist Partiyası ilə Tayvanın əsas müxalif qüvvəsi olan Millətçi Partiya (Koumintang) arasında müntəzəm dialoq mexanizminin qurulması və Tayvan boğazının hər iki tərəfində yaşayan gənclər üçün birgə platformaların yaradılması nəzərdə tutulur.
