Almaniyada 2028-ci ildən şirin içkilərə vergi tətbiq olunacaq
Fins.az - Almaniya hökuməti səhiyyə sistemində aparılan genişmiqyaslı islahatlar çərçivəsində 2028-ci ildən şirin içkilərə vergi tətbiq etməyi planlaşdırır.
Bu addımın əsas məqsədi piylənmə hallarının artmasının qarşısını almaq və səhiyyə sisteminə düşən yükü azaltmaqdır.
Gözlənilir ki, yeni vergi hesabına ildə təxminən 450 milyon avro vəsait toplanacaq. Bu vəsait federal büdcəyə deyil, icbari tibbi sığorta sistemi vasitəsilə profilaktik proqramların maliyyələşdirilməsinə yönəldiləcək. Proqramlara iş yerlərində sağlam həyat tərzinin təşviqi və əhali üçün müxtəlif ictimai təşəbbüslər daxildir.
Verginin konkret dərəcəsi və tətbiq mexanizmi hələ müzakirə mərhələsindədir. Bu təşəbbüs şəkərin həddindən artıq istehlakı və onun yaratdığı sağlamlıq problemlərinə qarşı daha sərt tədbirlərə artan ictimai dəstək fonunda irəli sürülüb.
