Azərbaycan 2,289 milyon ABŞ dolları dəyərində əczaçılıq məhsulları ixrac edib

Bu ilin yanvar-iyul aylarında Azərbaycan 305,496 milyon ABŞ dolları dəyərində əczaçılıq məhsulları idxal edib.

Finss.az Dövlət Gömrük Komitəsinə istinadən xəbər verir ki, bu rəqəm 2023-cü ilin eyni dövrü ilə müqayisədə 15,6% azalıb. Eyni zamanda, hesabat dövründə Azərbaycan 2,289 milyon ABŞ dolları dəyərində əczaçılıq məhsulları ixrac edib ki, bu da bir il əvvələ nisbətən 6 dəfə azalma deməkdir.

Əczaçılıq məhsulları üzrə idxal Azərbaycanın ümumi idxalının 2,83%-ni, ixrac isə ümumi ixracın cüzi 0,01%-ni təşkil edib. Bu göstəricilər, ölkənin əczaçılıq sektorunda idxalın hələ də çox böyük paya sahib olduğunu və ixracın isə nisbətən zəif qaldığını göstərir.

Qeyd edək ki, bu ilin yanvar-iyul aylarında Azərbaycan xarici ölkələrlə ümumilikdə 26 milyard 892,121 milyon ABŞ dolları dəyərində ticarət əməliyyatı aparıb ki, bu da ötən ilin eyni dövrü ilə müqayisədə 11,3% azdır. Xarici ticarət dövriyyəsinin 16 milyard 99 milyon ABŞ dolları ixracın, 10 milyard 793 milyon ABŞ dolları isə idxalın payına düşüb. Son bir il ərzində ixrac 22,5% azaldığı halda, idxal 12,9% artıb.

Bu dəyişikliklər nəticəsində Azərbaycanın xarici ticarətində 5 milyard 306 milyon dollarlıq müsbət saldo yaranıb, lakin bu saldo da illik müqayisədə 2,1 dəfə azalıb. Bu, ticarət balansında nəzərəçarpan dərəcədə zəifləməni göstərir.