Üç ayda dövlət büdcəsinə qeyri-neft sektorundan daxilolmalar 2,5 milyard manat təşkil edib

Maliyyə Nazirliyinin ilin ilk rübündə dövlət büdcəsinin icrasına (operativ) dair yaydığı açıqlamada deyilir ki, birinci rübdə dövlət büdcəsinə qeyri-neft sektorundan daxilolmalar 2,5 milyard manatdan çox olub.

Bildirilir ki, üç ayda dövlət büdcəsinin mədaxili 7 milyard 810,9 milyon manat və ya rüblük proqnoza qarşı 35,9 faiz çox icra olub. Həmin vəsaitin 32,5 faizi və yaxud 2 milyard 536,3 milyon manatı qeyri-neft sektorundan daxilolmaların payına düşüb.

Qeyd edək ki, rüb ərzində dövlət büdcəsinin mədaxili 7 milyard 810,9 milyon manat, xərcləri 5 milyard 254,8 milyon manat olub, 2 milyard 556,1 milyon manat məbləğində dövlət büdcəsinin artıqlığı (profisit) yaranıb.