JPMorgan: Qlobal neft tədarükü gündə 12 mln barelədək azala bilər

Fins.az - JPMorgan analitiklərinin proqnozuna görə, gələn həftənin sonuna qədər qlobal neft tədarükü gündəlik təxminən 12 milyon barel azala bilər.

Bunun əsas səbəbi Ormuz boğazından tanker hərəkətinin pozulmasıdır. Bildirilir ki, hazırda boğazdan kommersiya tanker daşımaları ciddi şəkildə məhdudlaşıb və bölgədəki gəmilərin əksəriyyəti İrana məxsusdur, onların da əsasən Çinə istiqamətləndiyi ehtimal olunur.

Boğaz bağlanmazdan əvvəl Fars körfəzindən çıxan yanacaq yüklü gəmilər hələ də yoldadır. Analitiklər hesab edir ki, Asiyaya tədarük bu həftə dayana bilər, Avropaya son yüklərin isə gələn həftə çatacağı gözlənilir.

Qeyd olunur ki, Fars körfəzi regionunun əsas neft istehsalçıları Ormuz boğazının faktiki bağlanması səbəbindən təxminən iki həftədir hasilatı azaltmağa başlayıblar. Bu boğazdan dünya üzrə neft tədarükünün təxminən beşdə biri keçir.