Əmlak qeydiyyatında aktivlik müşahidə olunur: Texniki pasport və ipoteka rəqəmləri artıb
2025-ci ilin yanvar-mart aylarında Azərbaycanda daşınmaz əmlak üzərində 85 708 mülkiyyət hüququ dövlət qeydiyyatına alınıb və çıxarışlarla təmin olunub.
Bu barədə Finss.az-a İqtisadiyyat Nazirliyi yanında Əmlak Məsələləri Dövlət Xidməti məlumat verib.
Məlumata görə, qeydiyyata alınan mülkiyyət hüquqlarının 13 424-ü və ya 15,7%-i ilkin, 72 284-ü və ya 84,3%-i isə təkrar qeydiyyat formasında həyata keçirilib.
Ən çox çıxarış torpaq sahələrinə verilib
Qeydiyyat statistikası əmlak növləri üzrə aşağıdakı şəkildə formalaşıb:
- Torpaq sahəsi: 49 386 vahid
- Mənzil: 19 200
- Fərdi yaşayış və bağ evləri: 14 224
- Qeyri-yaşayış sahəsi: 1 991
- Qeyri-yaşayış binası: 709
- Əmlak kompleksi: 147
- Çoxmərtəbəli yaşayış binası: 48
- Çoxillik əkmələr: 3
Bu göstəricilər əmlak bazarında ənənəvi olaraq torpaq və yaşayış sahələrinə üstünlük verildiyini göstərir.
Paytaxt və bölgələr üzrə bölünmə
Qeydiyyata alınan əmlak hüquqlarının 20 746-sı Bakı şəhərinin, qalan 64 962-si isə regionların payına düşüb. Bu da regionlarda daşınmaz əmlak dövriyyəsinin yüksək dinamikasını nümayiş etdirir.
Texniki pasport və ipoteka qeydiyyatı da artıb
Hesabat dövründə:
- 60 412 texniki pasport tərtib olunub,
- 14 444 ipoteka müqaviləsi rəsmi qeydiyyata alınıb.
Bu göstəricilər daşınmaz əmlak bazarında hüquqi tənzimləmələrin və kreditləşmənin fəallığını əks etdirir.
Fuad Mədətov
Finss.az
