Əmlak bazarında yeni rekord - Böyük Britaniya

Finss.az xəbər verir ki, Halifax konsaltinq şirkətinin son hesabatına əsasən, Böyük Britaniyada yaşayış əmlakının qiymətləri oktyabr ayında sentyabrla müqayisədə 0,6% artıb.

Bu artım nəticəsində ölkədə orta ev qiyməti rekord həddə – 299.862 funt sterlinqə (təxminən 393.000 dollar) yüksəlib.

Trading Economics portalının məlumatına görə, analitiklər orta hesabla cəmi 0,1% artım proqnozlaşdırırdılar. Lakin faktiki göstəricilər bazarda gözləniləndən daha güclü dinamikanı göstərib.

İllik müqayisədə Böyük Britaniyada ev qiymətləri 1,9% artım nümayiş etdirib, halbuki mütəxəssislər 1,45% artım gözləyirdilər. Sentyabr ayında isə əmlak qiymətləri aylıq müqayisədə 0,3% azalmış, illik əsasda isə 1,3% artım qeydə alınmışdı.

Mütəxəssislərin fikrincə, bu artımın səbəbləri arasında ipoteka faizlərində sabitləşmə, əmək bazarındakı davamlılıq və yaşayış sahələrinə artan tələbat kimi amillər dayanır.