"Captain America: Brave New World" kassada uğur qazansa da gözləntiləri doğrultmayıb
Captain America: Brave New World filminin qlobal kinoteatrlarda diqqətçəkən gəlir əldə etsə də, gözləntiləri tam qarşılamadığı bildirilir.
Fins.az xəbər verir ki, 2026-cı ilin ən çox gözlənilən premyeralarından biri olan film ABŞ və Kanadada 200,5 milyon dollar, digər ölkələrdə isə 214,6 milyon dollar gəlir toplayaraq ümumilikdə 415,1 milyon dollarlıq qlobal kassaya imza atıb.
Məlumata görə, layihənin istehsal büdcəsi təxminən 180 milyon dollar olub. Lakin ekspertlər bildirirlər ki, marketinq xərcləri də nəzərə alındıqda filmin özünü tam doğrultması üçün ən azı 425 milyon dollar gəlir əldə etməsi tələb olunurdu.
Bildirilib ki, film nümayişin ilk həftəsonunda 88,8 milyon dollar, dörd günlük açılış dövründə isə təxminən 100 milyon dollar gəlir əldə edərək güclü start götürüb.
Qeyd olunur ki, filmin süjet xətti yeni Kapitan Amerika – Sam Wilson obrazının qlobal siyasi böhran və təhlükələr fonunda apardığı mübarizəni əks etdirir.
Buna baxmayaraq, analitiklərin qiymətləndirməsinə görə, film əvvəlki Marvel Studios layihələri ilə müqayisədə daha zəif nəticə göstərib. Xüsusilə ikinci həftədə gəlirlərdə 68% azalma qeydə alındığı, bunun isə tamaşaçı marağının sürətlə azalmasına işarə etdiyi vurğulanır.
Nəticə etibarilə, film kassada ümumilikdə uğurlu sayılsa da, gözlənilən superblokbaster səviyyəsinə yüksələ bilmədiyi qeyd olunur.
