BVF Yaxın Şərqdə müharibənin uzanmasının qlobal iqtisadiyyata təsirləri barədə xəbərdarlıq edib

Fins.az - Beynəlxalq Valyuta Fondu Yaxın Şərqdə davam edən müharibənin uzanmasının qlobal iqtisadiyyat üçün ciddi risklər yaratdığı barədə xəbərdarlıq edib.

Qurumun idarəedici direktoru Kristalina Georgieva bildirib ki, münaqişənin 2027-ci ilə qədər davam etməsi və neft qiymətlərinin 125 dollar səviyyəsinə yüksəlməsi daha ağır iqtisadi nəticələrə səbəb ola bilər.

Onun sözlərinə görə, əvvəlcə qısamüddətli münaqişə ehtimalına əsaslanan ssenari artıq aktuallığını itirir. Həmin proqnozda qlobal iqtisadi artımın 3,1% səviyyəsində olması və inflyasiyanın 4,4%-ə qədər yüksəlməsi nəzərdə tutulurdu.

Georgieva vurğulayıb ki, müharibənin davam etməsi, neft qiymətlərinin 100 dollardan yuxarı qalxması və inflyasiya təzyiqlərinin artması artıq mənfi ssenarinin reallaşdığını göstərir. Bu tendensiya davam edərsə, inflyasiya gözləntilərinin daha da pisləşəcəyi qaçılmaz olacaq.