Azərbaycanda istehsal edilən elektrik enerjisinin ümumi həcmi 4,347 milyard kVt/saat təşkil edib

2026-cı ilin yanvar-fevral aylarında Azərbaycanda istehsal edilən elektrik enerjisinin ümumi həcmi 4,347 milyard kVt/saat təşkil edib.

Fins.az xəbər verir ki, bu məlumat Dövlət Statistika Komitəsinin açıqladığı yanvar-fevral makroiqtisadi göstəricilərində yer alıb.

Hesabata əsasən, istehsal edilmiş elektrik enerjisinin 4,212 milyard kVt/saatı əmtəəlik elektrik enerjisi olub ki, bu da 2025-ci ilin eyni dövrü ilə müqayisədə 216 milyon kVt/saat və ya 4,9% azalma deməkdir.

Eyni zamanda, elektrik enerjisi, qaz və buxar istehsalı, bölüşdürülməsi və təchizatı sektorunda 2026-cı ilin yanvar-fevral aylarında 671,6 milyon manat dəyərində məhsul istehsal olunub və xidmətlər göstərilib. Su təchizatı, tullantıların təmizlənməsi və emalı sektorunda istehsal olunmuş məhsulların həcmi isə 93,4 milyon manat təşkil edib.

Qeyd olunub ki, bu göstəricilər enerji istehsalı və xidmətlər sektorunun fəaliyyətinin izlənməsi, iqtisadi dinamikanın qiymətləndirilməsi üçün əsas statistik məlumatları təmin edir.