Amazon Anthropic-ə 25 milyard dollara qədər investisiya yatıracaq
Fins.az - Amazon şirkəti süni intellekt sahəsində fəaliyyət göstərən Anthropic startapına əlavə olaraq 25 milyard dollara qədər investisiya qoyacağını açıqlayıb.
Razılaşmaya əsasən, ilkin mərhələdə 5 milyard dollar sərmayə yatırılacaq, qalan 20 milyard dollar isə müəyyən kommersiya hədəflərinə nail olunduqdan sonra ayrılacaq. Bu investisiya şirkətin təxminən 380 milyard dollar dəyərində qiymətləndirilməsi fonunda həyata keçirilir. Qeyd edək ki, Amazon bundan əvvəl də Anthropic-ə 8 milyard dollar sərmayə yatırmışdı.
Bununla yanaşı, Anthropic növbəti 10 il ərzində Amazonun bulud xidmətlərinə 100 milyard dollardan çox vəsait xərcləməyi öhdəsinə götürüb. Bu çərçivədə şirkət süni intellekt çipləri və yüksək məhsuldarlıqlı server infrastrukturlarından istifadə edəcək.
Bu əməkdaşlıq süni intellekt sahəsində rəqabətin daha da gücləndiyini və iri texnologiya şirkətlərinin bu istiqamətə böyük həcmdə investisiyalar yönəltdiyini göstərir.
