Qızıl qiymətləri sabit qalıb
Qızıl qiymətləri çərşənbə axşamı Asiya sessiyasında ciddi dəyişiklik göstərməyib. İnvestorlar ABŞ və İran arasında əldə olunan sülh razılaşmasının detalları, eləcə də bu həftə keçiriləcək əsas mərkəzi bank iclaslarının nəticələrini gözləyirlər.
Fins.az xəbər verir ki, spot qızılın qiyməti 0,1% artaraq bir unsiya üçün 4 313,35 dollara çatıb. ABŞ qızıl fyuçersləri isə 0,4% azalaraq 4 333,90 dollar səviyyəsində qərarlaşıb.
Bazar ertəsi günü qızılın qiyməti 2%-dən çox yüksəlib. Buna səbəb ABŞ və İran arasında münaqişənin həllinə və Hörmüz boğazında gəmiçiliyin bərpasına dair ilkin razılaşmanın əldə olunması olub. Razılaşma inflyasiya riskləri ilə bağlı narahatlıqları zəiflədib və ABŞ dollarına təzyiq göstərib.
Ekspertlərin fikrincə, həftənin sonuna qədər rəsmi şəkildə imzalanması gözlənilən sülh sazişi neft bazarında kəskin ucuzlaşmaya səbəb olub və qlobal investorların risk iştahasını artırıb.
Belə ki, bazar ertəsi Brent markalı neftin qiyməti son üç ayın minimum səviyyəsinə enib. Eyni zamanda dünya fond bazarlarında yüksəliş qeydə alınıb. İnvestorlar hesab edirlər ki, enerji daşıyıcılarının ucuzlaşması inflyasiya təzyiqlərinin azalmasına kömək edə bilər.
Hazırda bazar iştirakçıları ABŞ və İran arasında əldə olunan razılaşmanın icra mexanizmlərini diqqətlə izləyirlər. Hər iki tərəf daimi atəşkəsin detallarının hələ tam razılaşdırılmadığını bildirib.
Bu həftə investorların diqqət mərkəzində həmçinin aparıcı mərkəzi bankların qərarları olacaq. İlk olaraq Yaponiya Mərkəzi Bankının iclası keçiriləcək. Daha sonra isə ABŞ Federal Ehtiyat Sistemi (FED) və İngiltərə Bankı pul-kredit siyasəti ilə bağlı qərarlarını açıqlayacaq.
Bazar iştirakçıları Yaponiya Mərkəzi Bankının faiz dərəcələrini son 31 ilin ən yüksək səviyyəsinə qaldıracağını gözləyirlər. FED-in isə 16-17 iyun tarixli iclasında faiz dərəcələrini dəyişməz saxlayacağı proqnozlaşdırılır.
İnvestorlar xüsusilə FED rəhbəri Kevin Uorşun çıxışına diqqət yetirəcəklər. Onun açıqlamaları ABŞ-da faiz siyasətinin gələcək istiqaməti ilə bağlı mühüm siqnallar verə bilər.
Analitiklər qeyd edirlər ki, faiz dərəcələrinin yüksəlməsi gəlir gətirməyən aktiv hesab olunan qızıl üçün mənfi amildir. Borclanma xərclərinin artması investorların alternativ investisiya alətlərinə marağını artırır.
ABŞ-da açıqlanan son inflyasiya göstəriciləri və qiymət təzyiqləri ilə bağlı narahatlıqlar bazar iştirakçılarının bu il faiz endirimi gözləntilərini də zəiflədib.
Digər qiymətli metallar arasında gümüşün qiyməti 0,8% azalaraq unsiya başına 69,41 dollara, platin isə 1% ucuzlaşaraq 1 755,60 dollara enib.
