Neftin bahalaşması: əlavə gəlir və iqtisadi risklər

Fins.az - Qlobal neft qiymətlərindəki artım Azərbaycan üçün əlavə gəlir imkanları yaratsa da, eyni zamanda müəyyən iqtisadi risklər də doğurur. Hazırda bazarda müşahidə olunan volatilliyə baxmayaraq, qiymətlər hökumətin proqnozlaşdırdığı səviyyədən yüksəkdir.

Azərbaycan gündəlik təxminən 450–500 min barel neft ixrac edir. Bu baxımdan, neftin hər barelinin qiymətinin 1 dollar artması ölkəyə gündəlik 450–500 min dollar, aylıq isə təxminən 15 milyon dollar əlavə gəlir gətirir. Mövcud şəraitdə isə qiymətlərin əvvəlki dövrlə müqayisədə təxminən iki dəfə artdığı müşahidə olunur ki, bu da büdcə daxilolmalarını əhəmiyyətli dərəcədə artırır.

Lakin mütəxəssislər qeyd edirlər ki, yüksək neft qiymətləri yalnız müsbət nəticələr vermir. Uzunmüddətli perspektivdə inflyasiya, iqtisadi asılılıq və qeyri-neft sektorunun zəifləməsi kimi risklər də yarana bilər. Buna görə də yaranan əlavə gəlirlərin düzgün idarə olunması xüsusi əhəmiyyət daşıyır.