Neft qiymətləri yenidən yüksəldi
Fins.az - Qlobal neft bazarında qiymətlər artımını davam etdirir.
Bazar ertəsi Asiya sessiyasında qeydə alınan yüksəlişə əsas səbəb ABŞ prezidenti Donald Trump-ın İrana Hörmüz boğazının açılması ilə bağlı verdiyi sərt ultimatum olub.
Brent markalı neftin qiyməti 110 dolları keçərək son günlərdəki artım trendini qoruyub. WTI markalı neft isə əvvəlki kəskin yüksəlişdən sonra sabit qalıb.
ABŞ prezidenti İrana çərşənbə axşamına qədər vaxt verərək boğazın açılmasını tələb edib və əks halda ciddi nəticələr barədə xəbərdarlıq edib. Bu bəyanatlar bazarlarda gərginliyi daha da artırıb.
İran tərəfi isə tranzitin yalnız müəyyən şərtlərlə bərpa oluna biləcəyini açıqlayıb. Rəsmi Tehran tranzit gəlirlərinin bir hissəsinin müharibə zərərlərinin kompensasiyasına yönəldilməsini istəyir.
Eyni zamanda OPEC+ ölkələrinin hasilatı artırmaq qərarına baxmayaraq, ekspertlər hesab edir ki, logistika problemləri səbəbindən bu artımın bazara təsiri məhdud olacaq.
Analitiklər bildirir ki, Hörmüz boğazında vəziyyətin qeyri-müəyyən qalması neft qiymətlərini daha da yüksəldə bilər və bu, qlobal inflyasiya risklərini artırır.
