Kriptovalyuta bazarı iyunda 16,9% dəyər itirib

Fins.az - İyun ayında qlobal kriptovalyuta bazarının ümumi kapitallaşması 16,9% azalaraq 2,13 trilyon ABŞ dollarına enib.

Binance Research-in aylıq hesabatına görə, bazardakı geriləmənin əsas səbəblərindən biri spot ETF-lərə gözlənilən həcmdə vəsait axınının baş verməməsi olub. Bununla yanaşı, altkoin satışları son beş ilin ən yüksək səviyyəsinə çatıb.

Analitiklər hesab edirlər ki, ABŞ Federal Ehtiyat Sisteminin sərt monetar siyasətə dair siqnalları, eləcə də İran və İsrail arasında atəşkəs danışıqlarının nəticəsiz qalması investorların riskli aktivlərə marağını azaldıb.

Hesabatda qeyd olunur ki, bu amillər aprel ayında müşahidə olunan yüksəlişin uzunmüddətli bərpa deyil, əsasən texniki xarakter daşıdığını göstərib.

Binance Research yaxın aylarda bazarın əsas diqqətinin Federal Ehtiyat Sisteminin növbəti qərarlarına və spot ETF-lərə kapital axınının dinamikasına yönələcəyini bildirir. Analitiklərin fikrincə, institusional investorlar bazara qayıdana qədər kriptovalyuta bazarında konsolidasiya mərhələsinin davam etməsi ehtimalı yüksəkdir.