Dövlət istiqrazları üzrə ödənişlər 1,4 milyardı keçdi – orta müddət uzanıb

Fins.az - 2026-cı ilin ilk üç ayı ərzində əvvəlki illərdə buraxılmış dövlət istiqrazları üzrə vaxtı çatmış 1 milyard 310,9 milyon manat məbləğində əsas borc ödənişləri həyata keçirilib.

Rəsmi məlumatlara görə, eyni dövrdə dövlət büdcəsinin vəsaiti hesabına 132,5 milyon manat məbləğində faiz və diskont ödənişləri də icra olunub. Beləliklə, ümumi ödəniş həcmi 1,4 milyard manatı ötüb.

Hesabat tarixinə dövriyyədə olan dövlət qiymətli kağızlarının ümumi həcmi 7 milyard 695,5 milyon manat təşkil edib. Bunun 54,4%-i 2 və 3 illik, 45,6%-i isə 5 il və daha uzunmüddətli istiqrazların payına düşür.

2026-cı ilin 1 aprel tarixinə dövlət istiqrazları üzrə Orta Ödəmə Müddəti (OÖM) 3,60 il olub. Qeyd olunur ki, ilin ilk rübündə qısamüddətli istiqrazların dövriyyə müddətinin başa çatması bu göstəricinin artmasına səbəb olub.

Analitiklər bildirirlər ki, orta müddətin uzanması dövlət borclanma strategiyasında uzunmüddətli alətlərə üstünlük verildiyini göstərir.