Alüminiumun qiyməti 2022-ci ildən bəri ilk dəfə 3500 dolları keçdi
Fins.az - Qlobal bazarda alüminiumun qiyməti bazar ertəsi günü ticarət zamanı 2022-ci ilin aprelindən bəri ilk dəfə 3500 dollar həddini keçib. London Metal Birjasında fyuçerslər gün ərzində 3544 dollara qədər yüksəlsə də, sonradan 3387 dollar səviyyəsinə qədər geriləyib.
Son bir həftə ərzində metalın qiyməti təxminən 10% artaraq son üç ilin ən böyük həftəlik yüksəlişini göstərib. Analitiklər qiymət artımını Yaxın Şərqdəki münaqişə fonunda tədarükün pozulması riskləri ilə əlaqələndirirlər. Region qlobal alüminium istehsalının təxminən 9%-ni təmin edir. Münaqişə səbəbilə Qətər və Bəhreyndəki bəzi zavodların tədarükləri dayandırması bazarda əlavə narahatlıq yaradıb.
Ekspertlərin fikrincə, münaqişə uzanarsa, alüminium tədarükü daha da məhdudlaşa bilər. Bu səbəbdən sənaye müəssisələri və digər istehlakçılar mümkün çatışmazlıq riskinə qarşı metal ehtiyatlarını artırmağa başlayıblar.
