Türkiyə 8 milyard dollarlıq qızıl satdı

Fins.az - Türkiyə Mərkəzi Bankı İranda müharibənin başlanmasından sonra qızıl ehtiyatlarında ciddi azalma ilə üzləşib.

Bloomberg-in yaydığı məlumata görə, tənzimləyici qurum iki həftə ərzində dəyəri 8 milyard dollardan çox olan təxminən 60 ton qızılı satıb və ya svop əməliyyatları vasitəsilə bazara çıxarıb.

Rəsmi statistikaya əsasən, martın 13-ü həftəsində ehtiyatlar 6 ton, martın 20-si həftəsində isə əlavə 52,4 ton azalıb. Beləliklə, ümumi azalma 58,4 ton təşkil edib ki, bu da son dövrlərdə ən kəskin geriləmələrdən biri hesab olunur.

Mənbələrin bildirdiyinə görə, qızılın bir hissəsi birbaşa satış yolu ilə realizə edilib. Digər hissəsi isə xarici valyuta və lirə likvidliyinin təmin olunması məqsədilə svop müqavilələri çərçivəsində istifadə olunub.

Ekspertlər hesab edir ki, bu addımlar həm daxili maliyyə sabitliyini qorumaq, həm də valyuta bazarındakı təzyiqləri azaltmaq məqsədi daşıyır. Bununla yanaşı, iri həcmdə satışlar qlobal qızıl bazarında qiymətlərə də təsir göstərərək əlavə təzyiq yaradıb.