Dayanıqlı inkişaf və investisiya axınları: Bakı Forumu iqtisadi tendensiyaları dəyişir

Fins.az - İslam İnkişaf Bankı (İİB) Qrupunun 14-cü Özəl Sektor Forumu 16–19 iyun tarixlərində Bakı Konqres Mərkəzində keçirilib və “Dayanıqlı rifah üçün regional inteqrasiya” mövzusu ətrafında qlobal iqtisadi gündəmin mühüm platformalarından birinə çevrilib.

Forum Azərbaycan Respublikasının Prezidenti İlham Əliyevin yüksək himayəsi altında baş tutaraq həm dövlət, həm də özəl sektorun iştirakı ilə geniş beynəlxalq əməkdaşlıq formatı yaradıb.

Tədbirə 60 ölkədən 1400-dən artıq iştirakçı qatılıb, proqram çərçivəsində 70-dən çox məruzəçi, 40-dək sərgi iştirakçısı iştirak edib, ümumilikdə isə 17 tədbir və panel müzakirəsi keçirilib. Bundan əlavə, 250-dən çox B2B və B2G görüş təşkil olunub, bu isə forumun yalnız müzakirə platforması deyil, real iqtisadi razılaşmalar məkanı olduğunu göstərir.

Ən diqqətçəkən nəticə ümumi dəyəri 4,7 milyard ABŞ dollarını ötən 32 saziş və anlaşma memorandumu olub.

Beynəlxalq konteksə əsasən, İİB Qrupunun 2025-ci il üzrə icmalında dünya iqtisadiyyatının yüksək qeyri-müəyyənlik şəraitində inkişaf etdiyi qeyd olunur. Geosiyasi parçalanma, ticarət zəncirlərində fasilələr və borc yükünün artması inkişaf etməkdə olan ölkələr üçün əlavə risklər yaradır.

Qlobal iqtisadi artım 3,4% səviyyəsinə düşsə də, İİB üzv ölkələri orta hesabla 4,0% artım göstərə bilib ki, bu da inkişaf banklarının stabilləşdirici rolunu təsdiqləyir.

İİB Qrupunun maliyyə göstəricilərinə görə, ümumi xalis təsdiqlər 15,8 milyard ABŞ dolları təşkil edib (2024-cü ilə nisbətən 20,2% artım), xərclər 11,0 milyard ABŞ dolları, ödənişlər 10,3 milyard ABŞ dolları olub, 77 layihə icra edilib.

Eyni zamanda, iqlim maliyyəsi ümumi portfelin 42%-nə yüksələrək dayanıqlı inkişaf istiqamətində struktur dəyişikliklərin sürətləndiyini göstərir.

Azərbaycan kontekstində Bakı forumu ölkənin regional iqtisadi inteqrasiyada artan rolunu bir daha ortaya qoyub. Azərbaycan İİB Qrupu ilə əməkdaşlığı nəqliyyat infrastrukturunun inkişafı, investisiya mühitinin yaxşılaşdırılması və özəl sektorun genişləndirilməsi istiqamətində prioritet kimi təqdim edir.

Forum çərçivəsində Azərbaycanın ev sahibliyi etdiyi platforma ölkənin Asiya və Avropa arasında körpü funksiyasını gücləndirir. İqtisadiyyat naziri Mikayıl Cabbarovun çıxışında qeyd edilib ki, Azərbaycan regional bağlantıların gücləndirilməsi, iqtisadi şaxələndirmə və dayanıqlı inkişaf strategiyası üzrə platforma rolunu genişləndirir.

İnnovasiya və özəl sektorla bağlı əsas mesajlardan biri özəl sektorun inkişafda aparıcı qüvvəyə çevrilməsi olub. İİB Qrupu risklərin azaldılması və investisiya imkanlarının genişləndirilməsini prioritet kimi müəyyən edib.

ICIEC, ICD və ITFC kimi institutların göstəriciləri İİB modelinin ticarət, sığorta, investisiya və texniki yardım inteqrasiyası üzərində qurulduğunu göstərir.

Bakıda keçirilən 14-cü Özəl Sektor Forumu göstərir ki, qlobal iqtisadi mühitdə inkişaf artıq tək dövlətlərin deyil, regional inteqrasiya və çoxtərəfli maliyyə institutlarının birgə fəaliyyətindən asılıdır.