Hongqi HS5 müasir dizayn və ağıllı texnologiyalarla diqqət çəkir
Fins.az – Hongqi HS5 premium SUV modeli müasir dizaynı, yüksək təhlükəsizlik göstəriciləri və qabaqcıl texnologiyaları ilə Azərbaycan bazarında təqdim olunur.
Şirkətin məlumatına görə, Hongqi HS5 incə estetik elementlərlə hazırlanmış xarici görünüşü ilə seçilir. Modelin kuzov konstruksiyasında 60 faizdən çox yüksək möhkəmlikli polad, eləcə də 1 500 MPa möhkəmliyə malik termoformalaşdırılmış polad təbəqələrdən istifadə olunub ki, bu da avtomobilin təhlükəsizlik səviyyəsini artırır.
Avtomobilin ölçüləri 4760 x 1907 x 1700 mm təşkil edir. Hongqi HS5 2.0 litrlik IT Turbo, 4 silindrli mühərrik, 6 pilləli Aisin avtomatik sürətlər qutusu və tam ötürücü (4x4) sistemi ilə təchiz edilib.
Texniki göstəricilərə əsasən, modelin maksimal gücü 165 kVt, çəkisi 1 795 kq, təkərlərinin ölçüsü isə 255/45 R20 təşkil edir.
Modeldə tətbiq edilən Hongqi Wing eksklüziv qarşılama işıqlandırma sistemi sürücü avtomobilə yaxınlaşdıqda qartalın qanad açmasını xatırladan LED işıq effekti yaradır və işıqlar avtomatik aktivləşir.
Komfort baxımından Hongqi HS5 yan hissələri qatlanan baş dayaqları, qızdırılan və havalandırılan oturacaqlarla təchiz olunub. Bu xüsusiyyətlər sürücü və sərnişinlər üçün daha rahat səyahət imkanı yaradır.
Bundan əlavə, avtomobildə Ekonom, Komfort, Sport, Yağış və Qar olmaqla beş sürücülük rejimi mövcuddur. Bu rejimlər ağıllı asma idarəetmə sistemi ilə birlikdə müxtəlif yol və hava şəraitində daha komfortlu və təhlükəsiz idarəetmə təmin edir.
