Qlobal brendlərin siyahısında dəyərinə görə 8-ci, Cənubi Koreyanın ən iri biznes konqlomeratı olan Samsung-un həbsdə olan rəhbəri bu həftə azadlığa çıxır.

Fins.az xəbər verir ki, ailə şirkətinin başçısı Lee Jae-yong məhkəmənin qərarı ilə iki il yarımlıq həbs müddətinin ən azı 60%-ni həbsxanada keçirdiyi üçün vaxtından əvvəl şərti azadlığa buraxılacaq.

Lee Jae-yong ilk dəfə 2017-ci ildə o zamankı Koreya prezidenti Park Geun-hyeyə şirkətdəki mövqeyini möhkəmlətmək və bununla əlaqədar dövlət dəstəyini almaq məqsədilə külli miqdarda rüşvət vermək ittihamı ilə həbs edilmişdi. Bir il həbsdə yatdıqdan sonra 2018-ci ilin fevralında appelyasiya məhkəməsi tərəfindən azadlığa buraxılan Lee istintaqın təkrar aparılmasına görə ötən il yenidən həbs olunub.

Biznes dairələri bu amnistiya aktını alqışlasa da, vətəndaşların bir hissəsi hazırkı prezident Moon Jae-inin iri şirkətlər qarşısında geri çəkildiyini və “ailələrin nəzarət etdiyi holdinqləri dizə gətirmək” vədini yerinə yetirmədiyini bildirir.

Samsung rəhbəri azadlığa çıxan kimi dərhal işinə başlaya bilsə də, onu iki növbəti məhkəmə prosesi gözləyir: 2015-ci ildə Samsung-un bioəczaçılıq bölməsinin alqı-satqısında 3,9 milyard dollarlıq mühasibatlıq fırıldağı və növbəti 5 il ərzində ödənməli olan 11 milyard dollar vergi öhdəliyi. Məhkəmə ittihamları sübuta yetirsə, dünyanın ən iri smartfon və kompüter çipi istehsalçısı yenidən rəhbərsiz qala bilər....