1 Oktyabr 2024-cü ildən Azərbaycanda alkoqollu içkilər və tütün məmulatlarının tranzit daşınması zamanı gömrük borcunun ödənilməsinin təmin edilməsi məqsədilə yeni tənzimləmələr qüvvəyə minəcək. Bu dəyişikliklər çərçivəsində Gömrük Məcəlləsinin 258.1.4-cü maddəsinə əsasən, təminat üsulu olaraq depozitin tətbiqinə başlanacaq.
Fins.az xəbər verir ki, yeni tənzimləməyə görə, tranzit daşınması həyata keçirən hər nəqliyyat vasitəsi üçün depozit məbləği minimum 200 000 ABŞ dolları ekvivalentində müəyyən edilib. Gömrük bəyannaməsi təsdiq edildiyi gün, vəsaitin Azərbaycan Mərkəzi Bankının müəyyən etdiyi məzənnəyə uyğun olaraq manat ifadəsində banka depozit şəklində qoyulmasına dair təsdiqedici sənəd gömrük orqanına təqdim olunmalıdır.
Yeni qanunun qiymətlərə təsiri
İqtisadçı Akif Nəsirli News24.az-a verdiyi müsahibədə bildirib ki, qanuna edilən dəyişikliklər alkoqollu içkilər və tütün məhsullarının qiymətinə müsbət təsir göstərməyəcək. Nəsirli qeyd edib ki, qanunun qəbul edilməsi alkoqollu içkilər və tütün məhsullarına əlavə xərclər gətirəcək:
“Yeni qanunun qəbul edilməsi, sözsüz ki, sahibkarlara əlavə xərclər gətirəcək. Hər bir sahibkar öz kapitalından 200 min ABŞ dolları ayırıb depozit qoymalıdır. Bu, sahibkarın maliyyə imkanlarını zəiflədəcək və nəticədə məhsul qiymətlərinin artırılmasına səbəb olacaq.”
İqtisadçı əlavə edib ki, depozitlərin tətbiqi məhsul üzərinə əlavə faizlərin gəlməsinə səbəb olacaq. Onun sözlərinə görə, alkoqollu içkilər və tütün məhsullarının qanun qüvvəyə mindikdən sonra bahalaşması gözləniləndir:
“Yeni qanunla alkoqollu içkilər və tütün məhsullarına tətbiq edilən vergi və aksiz dərəcələri artırıla bilər. Bu, istehsalçıların və satıcıların əlavə xərclərini qarşılamaq üçün məhsul qiymətlərini artırmasına səbəb ola bilər. Nəticədə, bazarda bu məhsulların qiymətləri yüksələcək. Qanunlar idxal olunan alkoqollu içkilər və tütün məhsullarına yeni tələblər və ya məhdudiyyətlər qoya bilər. İdxalın məhdudlaşdırılması yerli bazarda məhsulun qiymətini artıran təklif azlığına səbəb ola bilər.”
Bu dəyişikliklər, xüsusilə alkoqollu içkilər və tütün məmulatlarının istehsalı və ticarəti ilə məşğul olan sahibkarlar üçün əlavə maliyyə yükü yaratmaqla, bazar qiymətlərini artıra bilər. Qanunun təsiri bu məhsulların qiymətindəki artım olaraq özünü göstərəcək və istehlakçılar üçün iqtisadi təsir yarada bilər.