Finss.az - BMT-nin 2024-cü ildə açıqladığı “Dünya əhali proqnozları”na əsasən, qlobal miqyasda əhalinin yaşlanması tendensiyası daha da sürətlənir.

2025-ci il üçün hazırlanmış qiymətləndirmələr göstərir ki, bir sıra ölkələrdə 65 yaş və yuxarı şəxslərin əhalidəki payı rekord səviyyəyə çatır.

Ən yüksək yaşlı əhali payı Monakoda qeydə alınıb – bu ölkədə 65 yaşdan yuxarı şəxslər ümumi əhalinin 37 faizini təşkil edir. İkinci yerdə isə Yaponiya qərarlaşıb – burada yaşlıların əhalidəki payı 30 faizdir, bu da təxminən 37 milyon nəfərə bərabərdir. Yaponiya, eyni zamanda, yaşlı əhalinin sayına görə dünyada dördüncü yerdədir (Çin, Hindistan və ABŞ-dan sonra).

Qlobal miqyasda əhalinin yaşlanması bir çox ölkələr üçün sosial və iqtisadi çağırışlar yaradır. Sosial təminat sistemləri əsasən əmək qabiliyyətli əhalinin artımına əsaslanır. Lakin əhali strukturunda yaranan bu dəyişikliklər səhiyyə və sosial müdafiə sistemlərinə əlavə yük yaradır.

Qocalma tendensiyası xüsusilə Avropa ölkələrində daha qabarıq hiss olunur. Siyahıda yer alan 36 ölkədən 28-i Avropada yerləşir. Onların arasında İtaliya (25,1%), Almaniya (23,7%) və Fransa (22,4%) kimi aparıcı iqtisadi güclər də var.

Mütəxəssislər hesab edirlər ki, əhali strukturundakı bu dəyişikliklər dövlətlərin pensiya, səhiyyə və əmək bazarı siyasətlərinə ciddi təsir göstərəcək.