Finss.az - Azərbaycanda 445 meqavat gücündə "Biləsuvar" Günəş Elektrik Stansiyasının və 315 meqavat gücündə "Neftçala" Elektrik Stansiyasının işə salınması gələn ilə planlaşdırılır.

Bu barədə "Masdar" şirkətinin MDB üzrə biznesin və investisiyaların inkişafı departamentinin rəhbəri Məryəm Rəşid Əl-Mazrui, Asiya İnkişaf Bankının Milanda keçirilən 58-ci illik iclasında məlumat verib.

Əl-Mazrui bildirib ki, hər iki stansiya hazırda inşa mərhələsindədir və onların istifadəyə verilməsi gələn ilin əvvəlində gözlənilir. Şirkət, Bakıda keçirilən COP29 konfransı zamanı elan etdiyi maliyyə bağlanmasını uğurla tamamladığını qeyd edib və layihələrin tamamlanmasının təxminən bir il və ya bir il yarım çəkəcəyini bildirib. Bu stansiyalar tam gücü ilə fəaliyyətə başladıqda, Azərbaycanın enerji istehsal potensialı daha da artacaq.

Məryəm Rəşid Əl-Mazrui çıxışında "Masdar" şirkətinin Azərbaycanda yüksək fəallıq nümayiş etdirdiyini vurğulayıb və bu layihələrin ölkənin enerji sektoruna mühüm töhfə verəcəyini əlavə edib.