Fins.az - Britaniyanın nüfuzlu The Guardian nəşri Keniyada Facebook moderatorlarının iş şəraitinin ağır nəticələrini araşdırıb.

Məlumata görə, Meta şirkətinə və onun Keniyadakı tərəfdaşı Samasource Kenya-ya qarşı başlanmış məhkəmə prosesi zamanı bəlli olub ki, bəzi moderatorlar sosial şəbəkələrdə şokedici məzmunla işlədikləri üçün ağır posttravmatik stress pozuntusu (PTSP) ilə üzləşiblər.

Araşdırmalara əsasən, 40-a yaxın keçmiş işçi spirtli içkilərə, narkotik vasitələrə və yuxu dərmanlarına meyil edib. Onların bir qismi ailə münasibətlərinin pisləşməsi və cinsi istəyin azalması kimi şəxsi problemlərlə üzləşdiklərini bildiriblər.

Bu hadisə, sosial şəbəkələrin geniş yayılması ilə bağlı moderatorların qarşılaşdığı çətinlikləri bir daha ön plana çıxarır. İstifadəçilərin qorunması üçün tətbiq edilən tədbirlərin yüksək insan resursları tələbi və ağır psixoloji təsirləri diqqətə çatdırılır.

The Guardian-ın əldə etdiyi sənədlərə əsasən, 2019-2023-cü illər arasında Keniyadakı moderatorlar ABŞ-dakı həmkarlarına nisbətən 8 dəfə az maaş alıblar.