Fins.az - Dünyanın aparıcı enerji şirkətlərindən olan Shell və Norveçin Equinor şirkətləri Böyük Britaniyada yeni birgə neft-qaz şirkəti yaratmaq üçün şelfdəki aktivlərini birləşdirəcəklərini elan etdilər. Bu addım ölkədə neft və qaz hasilatını davam etdirmək və enerji təchizatının etibarlılığını təmin etmək məqsədi daşıyır.

Yeni birgə müəssisə (BM) hər iki şirkət arasında bərabər paylarla (50%-50%) bölüşdürüləcək. Equinor və Shell artıq uzun illərdir Böyük Britaniyanın Şimal dənizində fəaliyyət göstərən təcrübəli enerji nəhəngləridir.

Bu layihə, Böyük Britaniyanın mühüm enerji resursu olan şelfdə hasilatın təbii azalmasını kompensasiya etməyə və iqtisadi dəyər yaratmağa imkan verəcək. Yeni şirkət daha çevik, xərclər baxımından rəqabətqabiliyyətli və strateji baxımdan güclü mövqedə olacaq.

Birgə müəssisənin əsas məqsədi, neft-qaz yataqlarının və platformalarının uzunmüddətli istismarını təmin etməkdir. Bu məqsədlə, şirkət Böyük Britaniyanın enerji sektorunun mərkəzi sayılan Aberdin şəhərində fəaliyyət göstərəcək. Layihəyə Equinor-un Mariner, Rosebank və Buzzard yataqlarındakı, eləcə də Shell-in Shearwater, Penguins, Gannet, Nelson, Pierce, Jackdaw, Victory, Clair və Schiehallion yataqlarındakı payları daxil ediləcək.

Eyni zamanda, layihə çərçivəsində bir sıra kəşfiyyat lisenziyalarının da istifadəsi planlaşdırılır.