Burkina Fasonun ətraf mühit, su ehtiyatları və sanitariya naziri Rocer Baro, COP29 sammitində ölkəsinin 2030-cu ilə qədər istixana qazı emissiyalarını 29,42% azaldacağını açıqlayıb.

Fins.az-ın məlumatına görə, nazir, iqlim şərtləri və təhlükəsizlik təhdidləri ilə qarşılaşmasına baxmayaraq, Burkina Faso ətraf mühitə dair iddialı hədəflərə çatmaq üçün ciddi səylər göstərdiyini bildirib.

Bu məqsədlə hazırlanan planın ümumi dəyəri 4,1 milyard ABŞ dolları olaraq qiymətləndirilir. Nazirin sözlərinə görə, ölkə həmçinin 2024-2028-ci illər üçün Milli Uyğunlaşma Planını həyata keçirməyi hədəfləyir. Bu plan yerli icmaların və ekosistemlərin dayanıqlığını artıracaq və dəyəri 5 milyon ABŞ dolları olaraq qiymətləndirilir.

Burkina Faso, iqlim dəyişikliyi ilə mübarizəyə yönəlmiş bir sıra mühüm qanunvericilik və institusional addımlar atıb. Bu addımlar arasında milli monitorinq, hesabatlılıq və təsdiqləmə sisteminin yaradılması, eləcə də 2050-ci ilə qədər uzunmüddətli aşağı karbonlu inkişaf strategiyasının qəbul edilməsi yer alır.

Nazir, həmçinin Burkina Fasonun Səhraaltı regionda iqlim təhlükəsizliyi üzrə Bamako Bəyannaməsi və Kamapala Nazirlər Bəyannaməsi kimi beynəlxalq təşəbbüsləri fəal şəkildə dəstəklədiyini vurğulayıb. O, beynəlxalq ictimaiyyəti maliyyələşdirmə, texnologiyaların transferi və iqlim dəyişikliyi ilə mübarizə üçün potensialın artırılması məqsədilə daha aktiv tədbirlər görməyə çağırıb.