2021-ci ilin yanvar-iyun aylarında Azərbaycandan gömrükdə bəyan edilmiş qazın ixrac həcmi 10 milyard 347 milyon 923 min kubmetr təşkil edib ki, bu da ötən ilin analoji dövrünün göstəricisindən 57,3% çoxdur.

Bu barədə Dövlət Gömrük Komitəsindən (DGK) məlumat verilib.

Hesabat dövründə Azərbaycandan bəyan edilmiş qazın ixrac dəyəri 1 milyard 585 milyon 636,25 min (artım 25,8%) təşkil edib. Hesabat dövründə Azərbaycandan ixracın ümumi həcminin 18%-i (2020-ci ilin I yarısında 16,39%) qaz ixracının payına düşüb.

2021-ci ilin yanvar-iyun aylarında Türkiyəyə 880 milyon 744,5 min dollar dəyərində 6 milyard 292 milyon 876,25 min kubmetr, Gürcüstana 252 milyon 805,83 min dəyərində 1 milyard 989 milyon 974,2 min kubmetr qaz ixrac edilib.

Qeyd olunan dövrdə İtaliyaya 362 milyon 990,19 min dollar dəyərində 1 milyard 626 milyon 662,92 min kubmetr, Yunanıstana 69 milyon 170,85 min dollar dəyərində 266 milyon 460 min kubmetr, Bolqarıstana 16 milyon 734,57 min dollar dəyərində 119 milyon 560,07 min kubmetr qaz ixrac edilib. Beləliklə, 6 ay ərzində Avropaya 448 milyon 895,61 min dollar dəyərində 2 milyard 12 milyon 20,34 min kubmetr həcmində qaz ixrac edilib.

Bundan əlavə, Azərbaycan İrana 3 milyon 190,31 min dollar dəyərində 84 milyon 52,48 min kubmetr qaz ixrac edib.

Azərbaycan 2020-ci il dekabrın 31-dən Avropaya qaz nəqlinə başlayıb. 2021-ci ildə Avropaya 5-5,5 milyard kubmetr Azərbaycan qazının ixrac edilməsi planlaşdırılır.