Bu gün OPEC + nazirləri (OPEC və OPEC-ə üzv olmayan ölkələrin energetika nazirləri) iyun-iyul aylarında istehsalın artırılması qərarının düzgünlüyünü qiymətləndirəcəklər.

Marja xəbər verir ki OPEC+ gündəlik neft istehsalını artırmaq üçün apreldə qəbul etdikləri planı təsdiqləyə bilərlər. Hesablamalar göstərir ki, 2020-ci ilin dağılmasından sonra neft bazarı inamla bərpa olunur - neftə tələb artır və təklif kəsiri dərinləşir.

Aprel ayında müttəfiqlər, neft hasilatının may - iyul aylarında tədricən artırıla biləcəyinə dair razılığa gəliblər. Sürətlə dəyişən bir vəziyyət fonunda bu razılaşma təsdiqlənə bilər.

"OPEC +"dan yüksək səviyyəli bir səlahiyyətliyə görə, hasilatın artırılmasında ehtiyatlı olmaq lazımdır. Onun sözlərinə görə, İran nefti OPEC + üçün yeni bir problemdir. ABŞ-ın İranla nüvə sazişinə qayıtmasına dair danışıqlar, Tehrana qarşı sanksiyaların tezliklə ləğv edilməsinə səbəb ola bilər. Nəticədə 1-1,5 milyon barel neft ən qısa müddətdə bazara qayıda bilər. Eyni zamanda, İran istehsal gücünü 6,5 milyon barelə qədər genişləndirməyə hazır olduğunu bəyan edib. Bu vəziyyətdə OPEC + ölkələri hasilatı artırmaq üçün razılaşmanı yenidən nəzərdən keçirməlidir.

Hazırda tətbiq olunan sanksiyalara görə İran hasilatı azaltmaq öhdəliklərindən azaddır.