Finss.az - 2025-ci ilin yanvar-mart aylarında Azərbaycan dövlət büdcəsinin gəlirləri 9,733 milyard manat, xərcləri isə 8,115 milyard manat təşkil edib.

Dövlət Statistika Komitəsinin məlumatına əsasən, nəticədə 1,618 milyard manatlıq profisit yaranaraq ümumi daxili məhsulun (ÜDM) 5,4%-ni təşkil edib.

Büdcə gəlirlərinin strukturu:

• Ümumi gəlirlərin 41,2%-i vergi olmayan digər daxilolmalardan formalaşıb.

• Əlavə dəyər vergisi büdcə gəlirlərinin 23,6%-ni, hüquqi şəxslərin mənfəət vergisi isə 19,8%-ni təşkil edir.

• Fiziki şəxslərin gəlir vergisi 4,7%, xarici iqtisadi fəaliyyətlə bağlı vergilər 4,4% paya sahibdir.

• Aksizlər, sadələşdirilmiş vergi və digər vergi növləri də gəlirlərdə öz payını göstərir.

Büdcə xərclərinin əsas istiqamətləri:

• Müdafiə və milli təhlükəsizlik xərcləri ümumi büdcə xərclərinin 25%-ni, yəni 2,028 milyard manatı təşkil edib.

• Sosial müdafiə və təminat xərcləri 15,3% (1,241 milyard manat), təhsil və səhiyyə isə müvafiq olaraq 12,7% və 3,4% paya malikdir.

• İqtisadi fəaliyyətlərə ayrılan vəsait 13% (1,056 milyard manat), ümumi dövlət xidmətlərinə isə 12,7% (1,032 milyard manat) təşkil edib.

Rüblük göstəricilər:

2025-ci ilin I rübündə büdcə gəlirləri əvvəlki ilin müvafiq dövrü ilə müqayisədə 5,4% artaraq 9,733 milyard manata çatıb, xərclər isə 3,5% azalararaq 8,115 milyard manat olub. Bu isə büdcədə dayanıqlı maliyyə vəziyyətinin göstəricisidir.

Maliyyə Nazirliyinin son məlumatlarına görə, yanvar-aprel aylarında dövlət büdcəsinin gəlirləri 13,965 milyard manat, xərcləri isə 10,962 milyard manat təşkil etmiş, büdcənin icrasında 3 milyard manatlıq profisit yaranmışdır ki, bu da ÜDM-in 7,6%-nə bərabərdir.