Finss.az - Dövlət Statistika Komitəsi 2025-ci ilin yanvar-aprel ayları üzrə ölkənin makroiqtisadi göstəricilərini açıqlayıb. Məlumatlara əsasən, iqtisadiyyatın əsas sahələrində müxtəlif dəyişikliklər müşahidə olunur.

Əhalinin hər nəfərinə düşən ÜDM 3 841,8 manat təşkil edib ki, bu da ötən ilin eyni dövrü ilə müqayisədə 0,4%, 2023-cü ilin göstəricisindən isə 3,8% çoxdur.

Sənaye məhsulunun ümumi həcmi 20 986,4 milyon manat olub, lakin sənaye məhsulu 2024-cü ilin eyni dövrü ilə müqayisədə 2,2% azalıb. Maraqlıdır ki, qeyri neft-qaz sənayesi 5,3% artım nümayiş etdirib.

Əsas kapitala yönəldilmiş investisiyalar 5 069,3 milyon manat səviyyəsində olub və bu göstərici 2024-cü ilin yanvar-aprel ayları ilə müqayisədə 4,6% azalıb. Lakin qeyri neft-qaz sektoruna yatırımlar 5,3% artıb.

Kənd təsərrüfatı məhsulu 2 345,5 milyon manat təşkil edib, əvvəlki illə müqayisədə 1,8% artım var. Bitkiçilik 9,3%, heyvandarlıq isə 1,1% artıb.

Nəqliyyat sektorunda yük daşınması 3%, sərnişin daşınması isə 5,7% artıb. İnformasiya və rabitə xidmətləri 7,8% artaraq 1 122,3 milyon manata çatıb.

Pərakəndə ticarət dövriyyəsi 18 408,9 milyon manat olub və 3,7% artım qeydə alınıb. Əhaliyə göstərilən ödənişli xidmətlərdə isə artım daha yüksək, 9,6% təşkil edib.

Dövlət büdcəsinin gəlirləri 13 964,9 milyon manat, xərcləri isə 10 961,9 milyon manat olub. Büdcənin profisiti 3 003 milyon manat təşkil edib.

Əhalinin nominal gəlirləri 26 277,6 milyon manat olub, əhalinin banklardakı əmanətləri isə 15 074 milyon manata çataraq 14,6% artım göstərib.

Kredit qoyuluşları 29 679,4 milyon manat səviyyəsində olub, bu da 16,7% artımı göstərir.

Orta aylıq nominal əməkhaqqı 1 083,8 manat təşkil edib və 10% artıb.

Xarici ticarət dövriyyəsi faktiki qiymətlərlə 11 956,3 milyon ABŞ dolları olub, bunun 6 293,3 milyon dolları ixrac, 5 663 milyon dolları idxal təşkil edir.