Oktyabrın 20-də maliyyə naziri, Azərbaycan hökuməti ilə Səudiyyə Ərəbistanı Krallığı hökuməti arasında iqtisadiyyat, ticarət, investisiya, texnika, mədəniyyət, idman və gənclik sahələrində əməkdaşlıq üzrə Müştərək Komissiyanın həmsədri Samir Şərifov Səudiyyə Ərəbistanı Krallığının ölkəmizdə yeni təyin olunmuş fövqəladə və səlahiyyətli səfiri İssam bin Saleh əl-Cuteylini qəbul edib.

Bu barədə Fins.az-a qurumdan məlumat verilib.

Görüş zamanı iki ölkə arasında siyasi, iqtisadi və digər sahələrdə ikitərəfli əlaqələrin uğurla inkişaf etdiyi bildirilib, bu xüsusda Azərbaycan və Səudiyyə Ərəbistanı Hökumətlərinin yaratdığı əməkdaşlıq üzrə Müştərək Komissiyanın ölkələrimiz arasında siyasi, iqtisadi, enerji, kənd təsərrüfatı, turizm və digər sahələrdə əməkdaşlığın dərinləşməsinə verdiyi töhfə qeyd olunub. Eyni zamanda, beynəlxalq təşkilatlar və tədbirlər çərçivəsində ölkələrimizin bir-birinə qarşılıqlı dəstəyindən məmnunluq ifadə olunub.

Maliyyə naziri yeni səfiri təyinatı münasibətilə təbrik edərək Azərbaycandakı diplomatik fəaliyyətində ona uğurlar arzulayıb.

Fuad Mədətov
Fins.az